「冇人認就齊齊罰」

又係講吓教育子女嘅問題.

尋日發生咗件事, 個大女有啲時間係學校, 同一班同學走嚟走去.

老師(出嚟就鬧): 唔淮跑, 比一次機會你哋, 再見你哋跑就罰企.

班靚仔靚妹邊唔見棺材點會流眼淚, 過咗一陣, 又開始跑. 我個大女, 比外母捉住咗, 唔淮跑, 其他家長就冇理班細路.

過咗一陣, 老師就走出嚟: 全部罰企!

係, 連我個女都要罰.

當然外母發威, 同老師講: 我個孫冇跑喎!

老師: 我見到幾個紮住辮嘅女仔着住校服跑 (吓, 女仔有唔紥辮嘅咩? 有人係學校唔著校服嘅咩?)

除非有人出嚟認, 如果唔係就全部都要罰.

當然, 冇人出嚟認.

其他家長(竊竊私語): 比人罰吓洗死咩.

~故事完~

在下在以上故事明白了幾點:

1. 細路係永遠都話唔聽, 因為我信罰完無幾耐, 佢哋會再跑.

2. 一個人只要比少少權力佢, 就可以睇到佢嘅真性情, 由下至校工風紀, 上至老師校長.

3. 哩個世界係有寃獄嘅.

4. 唔係生得出嘅都識教仔.

5. 學校裏面嘅無上真理: 「冇人認就齊齊罰」

其實本人不屢都唔明白, 點解啲老師會諗到「冇人認就齊齊罰」哩個大道理,

我小學見過(有同學整爛咗個垃圾埇)

中學見過(有同學整爛咗盞課室燈)

讀大學都見過(哩單嘢唔講得)

而家到我個女讀書, 都係咁.

但社會上冇人會見到警察拉人拉唔到會, 就齊齊拉.

又唔會見到公司有鑊冇人認就齊齊炒晒, 總會屈個人出嚟交人.

你又唔會...(看圖)

但學校裏面, 就會有「冇人認就齊齊罰」哩個大道理.

我諗, 係啲老師讀教育degree或文憑嘅時候, 係有教哩個技巧嘅.

如果唔係, 點解個個老師都識用哩一招.

真係耐人尋味.