對中國人嚟講，咩都可以賭？只要有中國人嘅地方就有得賭，嚴重程度甚至在傳說中，有兩個相識的中國人，啱啱係厠所撞到，就以一餐午飯作賭注，賭下一個入嚟嘅人係開大定開細，點知入嚟果個係清潔呀姐。
其實今日嘅父母，對孩子在教育方面嘅態度，同賭博無咩分別，應該係話，哩個習慣係由我呀媽果代，就已經係咁。父母都相信一個傳說，既然唔知個細路鐘意啲咩又叻啲咩，不如就咩都比佢學吓，總有一樣買中佢嘅興趣又或者佢將來會做得叻就發達啦。方法就好似一個賭性難平嘅賭仔，對住一場毫無頭緒嘅十四匹賽馬，一於買最冷果十隻，實行大包圍。我唔知咁樣work唔work，因為我唔係好賭馬，但係我知十賭九騙所以十賭九輸。一班細路所學嘅興趣班係唔係十賭九騙我唔清楚，但就一定係十賭九輸，大個咗所學嘅全部比返晒先生。
就我呀媽而言，佢因為資本少所以輸得細，佢淨係買獨贏比我學咗六、七年鋼琴，加位置一年柔道，再補一飛三年中國功夫，而大個咗我唔識彈琴又唔打得。其實計返佢洗係我學琴上面嘅錢都大大話話半座琴加學費都洗咗五萬蚊，未計其他學習，另外果半座琴我就入咗我個妹數。而我個妹只係証明咗我呀媽嘅賭性難移所以賭輸多次，有芭蕾舞、鋼琴又咩咩咩......我呀媽兩次大包圍都開冇買到果四隻。
今時今日輪到我做家長，就承接住中國人賭博嘅劣根性，少少哋玩吓都比兩個女學芭蕾舞（行完沙圈退出咗！）、畫畫（騎師墮馬！）、鋼琴（仲跑緊不過包緊尾）。當然我會包裝得好好睇睇，明明係賭，就話叫做栽培（育成game？？）。再加上幾句「唔得咪算囉！」「比佢接觸多啲嘢囉！」咁就叫自己輸都輸得安樂啲。
其實到最後，既然我自己都係最鐘意玩返自己揀嘅打籃球同畫公仔（雖然都係唔叻，但最少三十幾歲人都仲好有passion去做！）咁有時栽唔栽培啲女，又有咩所謂？（不過我都好多謝我呀媽比我學琴，等我知道我個女練琴嘅時候係有偷懶，嘻！）
教育就係賭博，就睇你係諗住比個細路怡情定創業興家啦！（哩句係另一句講比自己聽嘅說話！）
沒有留言:
張貼留言