作為紅魔的球迷, 今年一定會面對的一條問題...

無可否認, 今年死梗, 有前四已經叫好好彩. 但彩永遠都唔係紅魔嘅好朋友, 球證係. 但今年連球證哩個好朋友都唔係好幫到手.

好啦, 冠軍就一定冇, 但失望之餘我哋仍可以make the best out of the season, 就係「詛咒我們極唔想佢得冠軍果隊」. 起碼唔開心之餘, 都叫做有啲世藝, 哩個玩法係從一個阿仙奴的die hard fan度學嘅, 佢話佢玩咗十年啦, 多數都係詛咒紅魔, 今年終於比佢咒到...

邊隊係最唔想佢攞冠軍?

1. 曼城:
勁唔想佢攞冠軍, 佢得一個字, 錢. 最憎啲人係財大氣粗但無料到. 賽程去咗一半就話四冠為目標, okay, fine, 你講得出因為你幼稚, 因為你從冇諗過賽程會密到你死, 到時唔好話四冠, 唔四大皆空都算執到. 當然大家都係曼市, 最唔鐘意曼市第一比人用錢換走, 當然都要怪自己唔爭氣, 但詛咒曼城確係首選.

2. 阿仙奴:
都衰咗咁多年啦, 大師, 我知唔關你事. 自從你年年保前四都勁吃力, 已經好少有時間毒舌紅魔. 今年你嘅努力終於pay off, 我諗你攞冠軍我都唔會太嬲. 況且, 都真係幾多好朋友係你fans, well, 比佢哋開心吓我係okay嘅.

3. 車路士:
其實我都幾想咒摩佬死, 唔係因為佢串, 係因為佢唔離開車仔, 係唔會嚟紅魔. 如果有一個摩佬, 一個莫佬係你面前比你揀, 論往績, 論名聲, 論實力, 傻嘅都知點揀. 為咗曼聯嘅未來, 車仔死都係好事.

4. 利物浦/熱刺:
算吧啦, 唔咒都自己會死.

最後都要講句: 費sir, 我好掛住你. 如果你肯返嚟, 我可以慳返只係詛咒曼城. 因為有一個費sir同一個摩佬係你面前, 論往績, 論名聲, 論實力, 傻嘅都知點揀啦!

費sir萬歲!